မမ
Saturday, April 25, 2009
စင်္ကာပူမှ မကျွတ်လွတ်သူ (၃)
အဲဒီအထဲမှာမှ.... စာကြည့်ခန်းထဲမှာနေတဲ့မချောက ဟိုတယ်နဲ့ပတ်သတ်ပြီး ဒီပလိုမာရထားတာဆိုတော့ အချိန်မှန်မဟုတ်တဲ့အတွက် သော့ယူထားတာ သူတစ်ယောက်ပဲရှိတယ်လေ ။
အဲဒီစာဂျပိုး စာအုပ်ထဲခေါင်းစိုက်နေတဲ့အချိန်မှာပဲ တံခါးဖွင့်သံ လူဝင်လာသံကြားတယ် ။ သူ့အခန်းရှေ့တင်ဖြတ်ပြီး အကျီင်္ အဖြူရောင်နဲ့ ဝင်သွားတာ သူမျက်လုံးဒေါင့်ကတွေ့သတဲ့ ။ ပြီးတော့ ဘီဒိုဖွင့်သံ အကျီလဲသံ ရေချိုးခန်းဝင်သံတွေ ကြားတယ်။
စာဂျပိုးလဲ လူရောက်ပြီ ဆိုတော့ အခန်းတံခါးပိတ်ပြီး စာဆက်လုပ်နေလေရဲ့ သူကလူတစ်ယောက် ကို မော့ကြည့်နှုတ်ဆက် အလာသပလာသ ပြောဘို့ အင်မတန်မှ ဝန်လေးတဲ့သူ။
သူ့စာကြည့်ချိန်ထဲက တစက္ကန့်မှ ဖဲ့မပေးနိုင်ဘူးဆိုတဲ့ ဂေါက်အမျိုးအစား။
အဲလိုနဲ့ နောက်တစ်နာရီလောက်ကြာတော့ ကျမတို့ ပြန်ရောက်လာတယ် ။ တီးလိုက်ရတဲ့ဘဲလ် အတောမသတ် စာဂျပိုးက အီးယားဖုန်းတတ်ပြီး ခေါင်းစိုက်နေပြီ။
သူ့ဟန်းဖုန်းခေါ်တော့မှ လာဖွင့်ပေးတယ် မကျေမနပ်နဲ့ပေါ့ ။ စူပုတ်ပြီး တံခါးလာဖွင့်တယ် ။ ကျမတို့ နဲ့ ရှေ့ဆင့်နောက်ဆင့် သူတံခါးဖွင့်နေတုန်းပဲ သော့ရှိတဲ့ မချောလဲရောက်လာတယ်။
သူက အလွန်တရာမှ အံ့သြတဲ့ မျက်နှာနဲ့ မချောကိုအောက်ဆင်း သွားတာလားလို့ မေးတယ်။
ကျမတို့ ကလဲ စကားမမေးစဖူး မေးနေတဲ့ စာဂျပိုးကို နင်သော့ဖွင့်မှ သူရောက်တာဆိုတော့။
အင်မတန်မှ သိပံ္ပပညာတဖက် ကမ်းခတ်အောင်တတ်တဲ့စာဂျပိုးက သူမျက်မှန်ကိုဖြုတ်လိုက်ပြီး အထိတ်တလန့်နဲ့ အိမ်မှာလူဘယ်နှစ်ယောက်ကျန်ခဲ့တာလဲတဲ့ ။
အယ် ... မိုးလင်းထဲက နင်တစ်ယောက်ပဲလေ တို့တတွေအားလုံး အိက်စပို(Expo) ဈေးလျှော့တာ သွားမယ်လို့ ပြောထွက်တာလေဟယ် လို့ ကျမကပြောတော့။
အာ... မဟုတ်ဖူး လွန်ခဲ့တဲ့ တစ်နာရီလောက်ထဲက သူပြန် ရောက်နေတာလေတဲ့ ။ မချောကို လက်ညိုးထိုးပြီး ပြောတယ် ။ မချောကလဲ မဟုတ်ဖူး အခုမှပြန် လာတာလို့ငြင်းတော့။
စာဂျပိုးက တစ်ခုခုတော့ မှားနေပြီ ဆိုပြီးသူ့တစ်ကိုယ်လုံး ကြက်သီးထသလို တစ်ချက်တွန့်လိုက်ပြီး လက်နှစ်ဖက် ကိုပိုက်ရင်း လွန်ခဲ့တဲ့တစ်နာရီလောက်က တံခါးဖွင့်ပြီး သူဝင်လာတယ်လေတဲ့...
ထပ်ပြောတယ် ။ ကျမတို့လဲ ဂေါက်မျိုးနွယ်ထဲက တစ်ယောက်တော့ ရာထူးတက်သွားပြီဆိုပြီး ပြုံးစိစိ နဲ့ အားကျကြည့်နဲ့ ကြည့်ကြတယ်။
သူဆက်ပြောတာတွေ နားထောင်ပြီးတဲ့ နောက်မှာတော့ ကျမတို့ တစ်ခုခုမှားယွင်းနေပြီဆိုတာ လက်ခံရတော့ တယ်။
အဲလို အဖြစ်အပျက်တွေရဲ့ နောက်များမှာတော့တစ်စုံတစ်ရာကိုကျမတို့ အလေးထားလာကြတော့တယ်။ ကျမကိုယ်တိုင်လဲ စာရေးစာဖတ် နောက်ကျတဲ့အချိန်တွေတိုင်း ဆယ့်နှစ်နာရီ နောက်ပိုင်းမှာ တစ်ယောက်ထဲ အိမ်ရှေ့ မှာစာရေးနေတဲ့ ကျမ စိတ်အနှောက်အယှက်ဖြစ်လောက်တဲ့အသံတွေ စတင်ခံစားမိလာတော့တယ် ။
အဲဒီထက်ပိုဆိုးတာက ကျမကညဥ့်နက်မှအိပ်တာပုံမှန်ပဲ အပြင်မှာကျမတစ်ယောက်ထဲလေ ။ တစ်နေ့စကားမစပ် အိမ်ရှေ့မှာ ကျမစိုက်ထားတဲ့ နှင်းဆီတွေက ပက်ပက်စက်စက်ကို ပွင့်နေတာ ကျမက တွေ့သမျှလူ အားလုံးကို ကြွားပါလေရော အဲဒီအချိန်မှာပဲ မိုးလင်းမိုးချုပ် ပရိုဂရမ်မင်းတွေနဲ့ ချာလပတ်ရမ်းပြီး ရတဲ့လစာတောင် သုံးဘို့ အချိန်မရအောင် တွေ့သမျှလူကို ကျမဂေါက်မျိုးနွယ်ပါလို့ သက်သေပြစရာမလိုပဲ မြင်တာနဲ့ဂေါက် ဆိုတာအော်တိုသိနိုင်တဲ့ တစ်ယောက်က ဘာမဆိုင်ညာမဆိုင် ပွင့်မှာပေါ့ မမ ကအချိန်မှန်ရေလောင်းတာကိုး လို့ဝင်ပြောတော့။
ကျမက အံ့သြလွန်းစွာနဲ့ ဘာသဘော ပါလိမ့် ငါလဲအချိန်မှန်တာ ဆိုလို့ဘဝမှာ ကွန်ပျူတာရှေ့ထိုင်တာလောက်ပဲ ရှိတာ နှင်းဆီဖူးတွေ တွေ့မှရေလောင်းဘို့သတိရတာပါ လို့တွေးရင်း ငါ့ကိုများနောက်သလားပေါ့။
မေးမိပေလို့ပဲ ရှင် ။ မေးများမမေးမိရင် တော့ ကျမဘဝရေစုန်မြောတာပဲ။
ဒီလိုရှင့် သူကညနက်တဲ့ နေရာကျမထက်သာတယ် ။ တစ်ခါတစ်လေ မိုးလင်းတန်းရေချိုးပြီး အလုပ်သွားတဲ့ ရက်တွေတောင်ရှိတယ်။
စဉ်းစားကြည့်ကြလေ ဘယ်လောက်များဂေါက်ပုံ ပေါက်နေမလဲဆိုတာ။
ကျမကနောက်ကျတယ်ဘယ်လောက်ပဲ ပြောပြော နာရီပြန်တစ်ချက်လောက်ဆို သီချင်းပိတ်ပြီ ။ နာရီပြန်နှစ်ချက်လောက်ဆိုမီးပိတ်ပြီ အဲဒါပုံမှန်နီးပါးပဲ။
အဲဒီအချိန် သူကပရိုဂရမ်တွေဆွဲလို့ကောင်းတုန်း သူပြောတဲ့ သဘောက ကျမသီချင်းပိတ် မီးပိတ်ပြီး နာရီဝက်လောက် ဆိုပုံမှန် တံခါးဖွင့်သံကြား သတဲ့ ။
ကျမတို့သော့တွဲကလဲရှင် ကိုင်လိုက်တာနဲ့ အတော်မြည်တဲ့အမျိူးလေ ပြီးရင်တံခါးဖွင့်ပြီး အမအပြင်ထွက်အပင် ရေလောင်းတယ် မဟုတ်လားတဲ့။
ကျမ ဘုရား ဘုရား တရင်း ကြံကြီးစီရာ ဟယ်၊ ငါမီးပိတ်ပြီး တန်းအိပ်တာပါ ည-၁၀-နာရီနောက်ပိုင်း တစ်ခါမှ အိမ်ပြင်ကို ခြေမချဘူးပါဘူး။
နင်တို့တွေနဲ့ အောက်တစ်ခါတစ်လေဆင်းတာ အတူသွားတာကလွဲလို့ ငါတစ်ယောက်ထဲ အချိန်မတော် တံခါးဖွင့် အပင်ရေလောင်းတဲ့ အလုပ် ၊ တစ်သက်နဲ့ တစ်ကိုယ် မလုပ်ဘူးပါဘူးဟာလို့ စိတ်ပျက်လက်ပျက် ပြောတော့မှ ၊ မမရယ် တစ်မျိုးမထင်ပါနဲ့ ကျမနေ့တိုင်းကြားတာပါရှင်၊ ထူးဆန်းတာက ထွက်တဲ့အသံပဲကြားပြီး ပြန်ဝင်လို့တံခါးပြန်ပိတ်တဲ့ အသံတော့ မကြားမိဘူးတဲ့ရှင့် ။
ကောင်းကြသေးရဲ့လား ။ ကျမလဲသူရော ရာထူးတက်တာလား လို့ စေ့စေ့ ကြည့်ရင်း အဲလိုကြားတာ ဘယ်လောက်ကြာပြီလဲလို့ ကျမမေးတော့ သူ့အဖြေ နဲ့ တိုက်ဆိုင်တာဘီဒို ရောက်ပြီးနောက်ပိုင်းပဲပေါ့ ။
အဲလိုနဲ့ မိန်းမဆိုတာမျိုးက တိုးတိုးတစ်မျိုး ကျယ်ကျယ်တစ်မျိုး အသစ်အဆန်းဆိုစိတ်ဝင်စားတာ တစ်စိတ်ကို တစ်အိတ်လုပ်တတ်ကြတာ။
ပိုဆိုးသွားတာ ကျမတို့က နဲနဲ ဂေါက် များများဂေါက် မသိမသာဂေါက် သိသိသာသာဂေါက် တွေစုဝေးရာဆိုတော့ မလတ်ကတော့ မဟုတ်တန်းတရားတွေနဲ့ ကိုယ့်အလုပ်ကိုယ်မလုပ်ဘူးတဲ့ ။ ပိုဆိုးသွားတာ စင်္ကာပူမှာ သရဲ မရှိတဲ့အိမ်ပြတဲ့။
သေဆုံးသွားပြီးတဲ့နောက် ပါးပါး မားမား အန်းကုန်း အန်းမ တူတူပြန်လိုက်ခဲ့နော် ဆိုပြီးနံမည်ထိုးပြီး တမင်ကိုအိမ်ပြန်ခေါ်ပြီး ကိုးကွယ်နေကြတာလေတဲ့။
မလတ်က အဲလိုပြောတော့ ပိုဆိုးကုန်တာပေါ့ ။ ကြောက်တဲ့သူက ပိုကြောက်သလို မကြောက်တဲ့သူကလဲ အိမ်တစ်လုံးမှာ သရဲဘယ်နှစ်ကောင်ရှိလဲ ဆာဗေး ဆင်းချင်တဲ့စိတ်တွေ ပေါက်လာတော့တာပေါ့။
ကျမကကြတော့ မလှုပ်တစ်လှုပ်နဲ့ ကျမတို့ကို ဟန်ရေးပြနေတာ ဘယ်သူလဲသိချင်စိတ်က ပိုပြင်းပြလာတော့တာ ။ တစ်နေ့ကျမ အိပ်တော့မယ် အိမ်ရှေ့မီး ဘုရားမီးတွေပိတ်ပြီးတဲ့ အချိန်မှာတော့ ဆိုဖါအနက်ပေါ်မှာ စောင်ခြုံပြီးငြိမ်နေလိုက်တော့တယ် ။ ခါတိုင်းဆို ခေါင်းချတာနဲ့ နှစ်နှစ်ခြိုက်ခြိုက် အိပ်ပျော်တဲ့ကျမ မျက်လုံးမှေးပြီး အိပ်ခြင်ဟန်ဆောင်နေတော့တာ ။ နာရီဝက် ၊လေးဆယ့်ငါးမိနစ်လောက်မှာ သော့သံတစ်ချွင်ချွင် စကြားတော့တာပဲ အိမ်မကြီးတံခါး လှပ်ခနဲပွင့်ပြီး ဝရန်တာမီးရောင်ဖြာခနဲ ၀င်လာချိန်မှာတော့ ကျမငုတ်တုတ်ထထိုင်နေပြီ ။ မလတ်အခန်းကိုခြေဖေါ့ပြီး ကျမပြေးတဲ့အချိန်မှာတော့ အခန်းတိုင်းက တံခါးတွေ ပွင့်လာတာနဲ့ အတူ ကျမ တို့အိမ်မကြီးတံခါးက ဂျိုင်းကနဲ ပြန်ပိတ်သွားတာ တစ်အိမ်လုံးတွေ့လိုက်ရတာပါပဲ။
ကျမတို့က အထပ်နှစ်ဆယ်ကျော် ဆိုတော့ လေကတစ်ဟူးဟူးလေ ။ တခါတလေ တံခါးဂျက်မချထားရင် တစ်ဂျိုင်းဂျိုင်းပြန် ပိတ်တဲ့အမျိုးဆိုတော့။
ဆူဆူညံညံတွေ ကြားမှာမလတ်က နောက်ဆုံးပြန်လာတဲ့သူ တံခါးဂျက်မချလို့ပေါ့လို့ ပြောပေမယ့် ၊ ညညအပင်ရေလောင်းတယ်ဆိုတာ လုံးဝလက်မခံနိုင်တဲ့ကျမနဲ့ ညတိုင်းသော့ဖွင့်သံကြားတယ် ဆိုတာတွေရဲ့ အဖြေကို ကျမတို့အားလုံး သိချင်နေလို့ အမှတ်တမဲ့ တွေကိုသက်သေပြဘို့ မတိုင်ပင်ပဲ စိတ်တူကိုယ်တူဖြစ်နေကြတော့တာပေါ့  ။
အဲဒါတွေထက်ပိုပြီး ခိုင်လုံတဲ့အကြောင်းပြချက်ကတော့ ထားဝယ်သူက မနက်စောစော ဟင်းထချက်တတ်တယ် ။ သူကလဲအင်ဂျင်နီယာပဲ ဒီမှာမာစတာပြီးတာ။
သူ့ကိုအထင်ကြီးပြီးခန့်ထားတဲ့ အလုပ်မှာ မနိုင်မနင်းနဲ့ ဂေါက်နေရှာသူ စိတ်နဲ့ကိုယ်နဲ့မကပ်ဘူး မဲမဲမြင်တိုင်း သူ့ကိုအမြဲဟောက်တဲ့ ပရောဂျက်မန်နေဂျာထင်ပြီး လန့်နေတတ်သူ။
သူကအေးခဲထားတဲ့ ဝက်အူစုံအသဲစုံကို မနက်ချက်ဘို့ အိပ်ခါနီးမှာ အပြင်ထုတ်ထားတယ် သူထုတ်ထားတာ ကျမလဲမသိဘူး ကျမစားပွဲနဲ့ မီးဖိုချောင်က ဒိုးယိုပေါက်လေ။
ဧည့်ခန်းမီးဖွင့်ပြီး စာရေးစာဖတ်လုပ်နေတဲ့ကျမ မီးဖိုချောင်ကိုလှမ်းမြင်ရပေမဲ့ ဟိုအရင်က တစ်ခါမှမကြည့်ဘူးပါဘူး ။ စာထဲအရမ်းစိတ်ဝင်စားနေတဲ့ အချိန်ဝုန်းဂလွမ်း ဆိုတဲ့အသံကြောင့် လိပ်ပြာလွင့်မတတ် ထအော်မိတဲ့ကျမ တစ်အိမ်လုံးထွက်လာကြတယ်။
ဘာဖြစ်တာလဲ ဆိုတော့ မသိဘူး ဘာသံမှန်းမသိဘူးဆို မီးဖိုချောင်ဝင်ပြီး မီးဖွင့်အဖြေရှာတော့ ဘေစင်ထဲမှာ ငြုပ်ကျည်ပွေ့ပဲ တွေ့တယ်။
ငြုပ်ဆုံထဲ ထောင်ထားတဲ့ကျည်ပွေ့ ညသန်းခေါင်မှာ စတီးဘေစင်ထဲ ပြုတ်ကြတဲ့ အသံ စဉ်းစားသာ ကြည့်ကြတော့။
အကုန်လုံးလဲလန့်နေပြီ မိန်းမတွေရဲ့ ပါးစပ်က ပွမှပွ ဖွမှဖွဆိုတော့ မလတ်ကလဲလန့်နေပြီ ။
အဲဒီအချိန်မှာပဲ အညာသူက ဒီမှာဝက်သားတွေ အူစုံအသဲစုံ ဘယ်သူ့ဟာတွေလဲ ဆိုတော့ ထားဝယ်သူ ဟာတွေ အဲဒါတွေကြောင့် အသံပေးနေတာဖြစ်မယ် ။
နင်မနက်ချက်စားဦးမလားလို့မေးတော့ သူလဲစိတ်မသန့်တော့ဘူး ထင်တယ် ။ လွှင့်ပစ်လိုက်တော့လို့ပြောတာနဲ့ ကျမတို့ အမှိုက်ပုံးကနေတစ်ဆင့် လွှင့်ပစ်လိုက်ကြတယ် ။မလတ်က မမနင်လဲဝင်အိပ်တော့ လူတွေကိုလျှောက်ခြောက်မနေနဲ့ လို့ ဖိန့်ဖိန့်နဲ့ ဝင်ဟောက်တယ် ။ သူ့အိမ်လူမရှိမှာ ကြောက်တယ်ထင်တယ်။
အာ.. မဟုတ်တာ ဘာလို့ခြောက်ရမလဲ ဒီလူတွေ အပြင် တစ်ယောက်ယောက် အပိုရှိတယ်ဆိုရင် ဒီကလူတွေသိအောင် တစ်ယောက်တစ်မျိုး မရိုးအောင်ပြစမ်းပါလို့ ကျမပြောတော့၊မလတ်ကနင်ဟာလေ အလိုက်ကန်းဆိုးတစ်စက်မှ မသိဘူးတဲ့။အဲဒီအချိန်အထိ ဘီဒိုကြီးကို ကျမတို့ သံသယတစ်စက်မှကို မဝင်သေးဘူးရှင်။
Labels: စင်္ကာပူမှ မကျွတ်လွတ်သူ (၃)
